පිටසක්වළ ජීවය තේමා කරගනිමින් පළකැරුණු විදුසර 35 වැනි විශේෂ සංවත්සර කලාපය වෙනුවෙන් ලියැවුණු අතර 2023 නොවැම්බර් 1 දින පළකැරුණු එම කලාපයෙහි විද්‍යා ප්‍රබන්ධය වශයෙන් පළ කැරිණි.
මුලු පෘථිවිය ම දැන් මා සලකන්නේ ද්‍රෝහියෙකු ලෙස ය. ඔවුන්ගේ ඉදිරි ගමනට වළ කපන්නට හැදූ වර්ගවාදී උම්මත්තකයකු ලෙස ය. කෙසේ නමුත් දැන් බහුතරයේ මතය ජයගෙන හමාර ය. අනිමාරා ශිෂ්ටාචාරයේ ඒ භයානක යෝජනාවට එකඟ වීමට ඔවුන් තීරණය කර තිබේ. ඒ යෝජනාවට විරුද්ධ වූ එකම නියෝජිතයා මම වීමි. සෙසු සිව්දෙනා ම ඒ ඇඟ කිළිපොලන යෝජනාවට එකඟ වූයේ මිනිස් වර්ගයාගේ අනන්‍යතාවය ගැන වගේ වගක් නොතිබුණු ගානට ය. ඔවුන්ට අනුව මා කරන්නේ තමන් මුහුණ පා ඇති සියලුම අර්බුදවලින් මිදෙන්නට මිනිස් වගට උදා වූ මහඟු අවස්ථාවක් අහිමි කිරීමට තැත් කිරීම ය. පිටසක්වළ සබඳතා සම්බන්ධයෙන් පත් කර ඇති එක්සත් ජාතීන්ගේ විශේෂ කමිටුව දැනටමත් නිගමනය කර ඇත්තේ සාකච්ඡාවේ දී මා පළකළ කරුණු හේතුවෙන් අනිමාරාවරුන් සිය යෝජනාව හකුළා ගන්නට ඉඩ ඇති බව ය. ඔවුන් පවසන පරිදි එසේ වුවහොත් සිදුවන්නේ සිය තාක්ෂණික, පාරිසරික, බලශක්ති ඈ සියලුම අර්බුද ජයගැනීමට පෘථිවියට ලැබුණු ඉතා වටිනා දුලබ අවස්ථාවක් අහිමි වී යාම ය.
සැබවින් ම පෘථිවිය දැන් පවතින්නේ ඉතා ම අවාසනාවන්ත තත්ත්වයක ය. හරිතාගාර ආචරණය හේතුවෙන් උෂ්ණත්වය ඉතා ඉහළ ගොස් තිබුණු අතර ශරීරයට අහිතකර විකිරණවලට ලක්වීමෙන් තොර ව බාහිර පරිසරයේ ගමන් කිරීමට විශේෂ ඇඳුම් පැළඳිය යුතු විය. මුලු ජනගහනයට ම සරිලන පරිදි මේ ඇඳුම් නිෂ්පාදනයට වත්කම් තිබුණේ යුරෝපීය සංගමය ඇතුලු බලවත් රාජ්‍ය කිහිපයකට පමණක් වූ අතර සෙසු රටවල අති බහුතරයක් ජනතාව අහිතකර විකිරණවලට ලක්වීමෙන් ද ආශ්වාසයට නුසුදුසු වාතය ආඝ්‍රාණයෙන් ද මියගොස් සිටියහ. අනෙක් අතින් බලශක්ති අර්බුදය ද එල්ල කරමින් සිටියේ දරාගත නො හැකි පීඩනයකි. මේ වන විට ෆොසිල ඉන්ධන මුළුමනින් ම ක්ෂය වී තිබුණු අතර න්‍යෂ්ටික බලශක්තිය භාවිතා කිරීම ද ක්‍රමයෙන් සීමා කරන්නට සිදු ව තිබුණේ න්‍යෂ්ටික අපද්‍රව්‍ය ප්‍රමාණය ඉහළ යාමත් සමග ඒවා ආරක්ෂිත ලෙස බැහැරලීම සම්බන්ධ ව ගැටලු පැන නැගුණු බැවිනි.
අනිමාරාවරු මේ සියලු ගැටලු විසඳා දෙන බවට පොරොන්දු විය. කාර්ඩෂොෆ් පරිමාණයේ දෙවන අදියරේ සිටි ශිෂ්ටාචාරයක් වූ ඔවුන් විසින් නුදුරු වසර 10ක් තුළ අප සූර්යයා වටා ඉදිකෙරෙන දැවැන්ත ඩයිසන් ගෝලයක් විසින් පෘථිවියේ බලශක්ති අවශ්‍යතාවය සූර්යයා පවතින තාක් විසඳෙනු ඇත. එමෙන් ම එකී ඩයිසන් ගෝලය තුළ ම අන්තර්ගත කළ හැකි විශේෂ විකිරණ පෙරණයක් මගින් පෙර පැවති පරිදි ම අහිතකර විකිරණවලින් තොර පරිසරයකට උරුමකම් කියන්නට ද අපට හැකිවනු ඇත. සිය වාසයට හිතකර නොවන වායුගෝලයන් සහ උෂ්ණත්වයන් සහිත ග්‍රහලෝක වාසයට සුදුසු පාරිසරික තත්ත්වයන්ට ලක් කිරීමේ ක්‍රියාවලිය හෙවත් පෘථිවිකරණයෙහි (terraforming) විශිෂ්ටයන් මෙන් ම ග්‍රහලෝකයක කාලගුණය සහ දේශගුණය කෘත්‍රිම ව කළමණාකරණය කිරීමට තරම් දක්ෂයන් වන ඔවුන්ට පෘථිවියේ දූෂිත වායුගෝලය මනුෂ්‍යයාට හිතකර තත්ත්වයකට ගෙන ඒම සහ ගෝලීය උෂ්ණත්වය පහළ දැමීම ද ඉතා ම සුළු කාරියකි.
මේ සියල්ල වෙනුවෙන් ඔවුන් අපෙන් ඉල්ලා සිටින්නේ මොනවා ද? ඔවුන් පෘථිවියේ ආධිපත්‍යයක් ඉල්ලා සිටින්නේ ද? නැත. එමෙන් ම එක්සත් ජාතීන්ගේ සන්ධානය හෝ අන්තර්ජාතික මූල්‍ය අරමුදල තුන්වන ලෝකයේ රටවලට ආධාර සැපයීමේ දී කළාක් මෙන් යම් යම් දේශපාලනික ප්‍රමිතීන් සපුරාලීමට අපට බලපෑම් කරන්නේ ද ? නැත. අපේ නියෝජිතයන්ගේ වචනයෙන් කිවහොත් ඔවුන් කර ඇත්තේ ඉතා ම අහිංසක (?) ඉල්ලීමකි.
අපට කරන්නට ඇත්තේ අනිමාරාවරුන් විසින් ඉදිරි කාලයේ දී අප වෙත ලබා දෙනු ලබන DNA සහ ජාන තාක්ෂණික උපදෙස් අනුව පෘථිවිවාසීන් සියලුදෙනාගේ ප්‍රවේණික දත්ත වෙනස් කිරීම පමණ ය. පරම්පරාවෙන් පරම්පරාවට ක්‍රම ක්‍රමයෙන් ජාන විකෘතිය වැඩි වෙමින් සිදු කළ හැකි ලෙස ජෛවලේඛනය කරන ලද අණු ඉදිරියේ දී මේ සඳහා ම ඔවුන් විසින් ලබා දෙනු ඇත. එක්සත් ජාතීන්ගෙන් සහ පෘථිවියේ සියලු රාජ්‍යයන්ගෙන් සිය කැපවීම වෙනුවෙන් ඔවුන් ඉල්ලා සිටින්නේ මේ සරළ ඉල්ලීම යි!
මෙය මනුෂ්‍ය වර්ගයා විනාශ කිරීමේ මහා කුමන්ත්‍රණයක් බවත් මෙයට කෙසේවත් ඉඩ නොතැබිය යුතු බවත් මම නොවළහා ම පැවසුවෙමි. ඊට අපේ පෘථිවියේ බලවතුන්ගේ, විද්‍යාඥයන්ගේ පමණක් නො ව පොදු මහජනතාවගේ ද ප්‍රතිචාරය කුමක් විණි ද? ඔවුන් පවසන පරිදි මා දැඩි හෝමෝ සේපියන්වාදියෙකි! මාත් මගේ අදහස අනුමත කරන සුළුතරයක් විද්‍යාඥයන් සහ බලධාරීනුත් හඳුන්වන්නට Sapience chauvinism යනුවෙන් ඔවුන් වෙනම ම වචනයක් ද දැනටමත් නිපදවාගෙන තිබේ. ඔවුන් ඒ වචනය පවසන්නේ දැඩි අවඥාසහගත ස්වරයකින් ය. ඔවුන් පවසන පරිදි මේ මොහොතේ වඩා වටින්නේ මඟුල් DNA අණුවක පරම පවිත්‍රතාවය නො වේ. ලෝකය මේ පත් වී ඇති අර්බුදවලින් මිදීම යි. මේ පවතින අර්බුද හමුවේ තව වසර සියයක් ඇතුළත මනුෂ්‍ය වර්ගයා කොහොමත් විනාශ වී යනු ඇත. නමුත් මේ මොහොතේ අප අපේ දොර එළිපත්තට ම මේ පැමිණි වාසනාව පිළිගතහොත් අඩු තරමේ හෝමෝ සේපියන් යන ඊනියා අනන්‍යතාවය කෙසේවෙතත් අපගේ ඉදිරි පරම්පරා සහ ශිෂ්ටාචාරයවත් මේ විශ්වයේ සුරක්ෂිත වනු ඇත.
මට ඔවුන්ගේ තර්කය සමඟ එකඟවීමට හිත හදා ගත නො හැකි වුවත් ඔවුන්ගේ මානසිකත්වය වටහා ගැනීමට හැකි ය. මට වටහාගත නොහැක්කේ අනිමාරාවරුන්ගේ මානසිකත්වය යි. ඔවුන් අපේ විද්‍යා ප්‍රබන්ධවල පෙන්වා ඇති ආකාරයේ ආක්‍රමණික අය නො වේ. ඔවුන් ඉතා ම සාමකාමී ය. ඇත්තෙන් ම කිවහොත් අපට ඔවුන්ගේ යෝජනාවට එකඟ නොවීමට පූර්ණ නිදහස ද තිබේ. එමෙන් ම ඔවුන්ට අප ව ඔවුන්ගේ විශේෂය බවට පත්කරගැනීමට ඔතරම් අවශ්‍ය නම් බලය යොදා එය කරගැනීමට බැරිකමක් ද නැත. නමුත් ඔවුන් එසේ කරන්නේද නැත. අනෙක් අතට අපට ඔවුන්ගේ යෝජනාවට එකඟ වන්නට බල කෙරෙන තත්ත්වයකට අප පත් ව ඇත්තේ විහින් ම ය. ඔවුන් අවංකව ම අපට උපකාර කිරීමට කැමැත්තෙන් සිටින බව පැහැදිලි ය. නමුත් ඔවුන් මෙවැනි ඉල්ලීමක් කරන්නේ මන්ද? මම මිතුරු අනිමාරා නියෝජිතයකුගෙන් (ඔව්! මොන මතභේද තිබුණත් රාජ්‍යතාන්ත්‍රික සුහදත්වයක් අප අතර විය.) මේ ගැන විමසුවෙමි. ඔහු දුන් පිළිතුර මට තවමත් වටහා ගත නො හැකි ය. “ආධ්‍යාත්මික අවශ්‍යතාවයක් වෙනුවෙන්" ඔහු පැවසුවේ ය. එක අතකට මට ඔවුන්ගේ ආධ්‍යාත්මය වටහා ගැනීමට නො හැකි වීමේ පුදුමයක් ද නැත. ඔවුන්ගේ ආධ්‍යාත්මය ද අපට වටහා ගත නො හැකි තරම් ම ආගන්තුක (alien) ය.
පැහැදිලි කිරීම්
කාර්ඩෂොෆ් පරිමාණය (Kardashev scale) -
විශ්වයේ පැවතිය හැකි දියුණු ශිෂ්ටාචාර බලශක්තිමය දියුණුව අතින් ඔවුන් සිටින තත්ත්වය අනුව වර්ග කෙරෙන පරිමාණයකි. මෙයට අනුව පළමු අදියරේ ශිෂ්ටාචාර සිය ග්‍රහයා තුළ සමස්ත ශක්තිය එක්රැස් කරගැනීමට සහ පරිහරණය කිරීමට (එමෙන් ම ඇතැම් ස්වාභාවික විපත් පරිපාලනයට ද) ද, දෙවන අදියරේ ශිෂ්ටාචාර සිය සෞරග්‍රහ මණ්ඩලය තුළ පවතින සමස්ත ශක්තිය ම ඒකරාශී කරගැනීමට සහ පරිභෝජනයට ද, තෙවන අදියරේ ශිෂ්ටාචාර සිය චක්‍රාවාටය තුළ ඇති සමස්ත ශක්තිය ම නියාමනයට (කලු කුහර ඇතුලු) ද සමත් වේ. සමස්ත විශ්වයේ ම ශක්තිය හැසිරවිය හැකි දිව්‍යමය ස්වභාවයේ ශිෂ්ටාචාරයක් සිව්වන හෙවත් අවසන් අදියර ලෙස ඇතැමුන් විසින් සලකනු ලැබේ. රුසියානු තාරකා විද්‍යාඥයකු වූ නිකොලායි කාර්ඩෂොෆ් විසින් මෙය ඉදිරිපත් කරන ලදී.
අති දියුණු ශිෂ්ටාචාරයක් විසින් සිය බලශක්ති අවශ්‍යතා සපුරා ගැනීම පිණිස යොදාගනු ඇතැ යි විශ්වාස කෙරෙන, තාරකාවක් මුලුමනින් ම හෝ අර්ධ වශයෙන් ආවරණය කරගනිමින් නිර්මාණය කෙරෙන අධිපරිමාණීය ව්‍යූහයකි (megastructure). මෙවැන්නක් මගින් තාරකාවක සම්පූර්ණ ශක්තිය ම හෝ එහි සැලකිය යුතු ප්‍රතිශතයක් ලබාගැනීමට එවැනි ශිෂ්ටාචාරයක් සමත් වනු ඇති බවට සැලකේ. භෞතික විද්‍යාඥයකු වූ ෆ්‍රීමන් ඩයිසන් විසින් මෙම සංකල්පය ඉදිරිපත් කරන ලදී.
